უზენაესო, ყოვლისშემძლე, კარგო უფალო,
შენია ხოტბა, დიდება, პატივი და ყოველი ლოცვა-კურთხევა.
შენ ერთადერთს, უზენაესო, გეკუთვნის ეს ყოველივე,
და ძე კაცისა შენი ხსენების ღირსი არაა.

გაქებთ შენ, ღმერთო ჩემო, შენი ყოველი ქმნილების მეოხებით
უფრორე ბატონი ძმა მზის,
ის დღეა და შენ სინათლეს მისით გვჩუქნი.
რარიგად მშვენიერია ის, როგორ ბრწყინავს დიდებულებით,
შენი ხატება, ო, უზენაესო.

გაქებთ შენ, ღმერთო ჩემო, და მთვარის და ვარსკვლავების მეოხებით,
ცაში შეჰქმენი ისინი, მოკაშკაშენი და ძვირფასნი და მშვენიერნი.

გაქებთ შენ, ღმერთო ჩემო, ძმების – ქარის და ჰაერის მეოხებით,
და ღრუბლებით და ნათელი ცით და ყოველგვარი ამინდით, რომლითაც შენს ქმნილებებს ასაზრდოვებ.

გაქებთ შენ, ღმერთო ჩემო, და წყლის მეოხებით,
რარიგ მარგებელი და მოკრძალებული და ძვირფასი და უბიწოა ის.

გაქებთ შენ, ღმერთო ჩემო, ძმა ცეცხლის მეოხებით,
რომლითაც უკუნს ანათებ,
რარიგ ლამაზი და მხიარული და მძლავრი და ძლიერია ის.

გაქებთ შენ, ღმერთო ჩემო, ჩვენი და დედა მიწის მეოხებით,
რომელიც გვკვებავს და გვმართავს
და ჰქმნის მრავალგვარ ნაყოფს და ჭრელ ყვავილებს ბალახთან ერთად.

გაქებთ შენ, ღმერთო ჩემო, იმათი მეოხებით, რომელნიც შენი სიყვარულით მიუტევებენ,
და სენსა და სევდას იტანენ.
ნეტარ არიან, რომელნიც ამას მშვიდად იქმიან, რადგან შენგან, უზენაესო, გვირგვინით შეიმოსებიან.

გაქებთ შენ, ღმერთო ჩემო, ჩვენი დის, ხორციელი სიკვდილის მეოხებით,
რომელსაც ძე კაცისა ვერ გაექცევა.
ვაი მათ, რომელნიც ძმიმე ცოდვით იღუპებიან.
ნეტარ არიან, რომელნიც შენს უწმინდეს ნებაში თავს იპოვნიან,
რადგან მეორე სიკვდილი მათ ვერრას დააკლებს.

შეაქეთ და ადიდეთ ჩემი უფალი,
უმადლოდეთ და დიდი თავმდაბლობით ემსახურეთ მას.

თარგმანი ხატია ღუდუშაურისა

ფოტოზე: ჯოტო დი ბონდონე (1267-1337), ფრანცის ასიზელი უქადაგებს ჩიტებს, ასიზის/იტალია წმინდა ფრანცის ასიზელის ბაზილიკის ფრესკა, დაახლ. 1295 წელი